سريبروماب 100 أو 200 كبسول تنشيط الدورة الدموية

  سريبروماب هو دواء من عيلة أدوية اسمها (موسعات الشرايين الطرفية)، سريبروماب بيوسع الشرايين اللى بتغذي الإيدين والرجلين والمخ، ولما الشرايين دي توسع، الدم اللي هيمشي فيها هيزيد، وكمية الأوكسجين والمغذيات اللى هتوصل للأيدين والرجلين والمخ هتزيد بردوا.

علشان سريبروماب بيحسن ويزود كمية الدم والأوكسجين والمغذيات اللي بتوصل للإيدين والرجلين والمخ، فممكن الدكتور يكتبة للعيان اللى عندة سكر مثلاً وعندة مشاكل في رجلة او ايدة (التنميل اللى بيحصل مع السكر)، او لو رجلة إتجرحت وعملت بداية قرحة ، فبرشام سريبروماب هيقلل مضاعفات السكر، ويخفف جروح وقرح الرجلين بسرعة اكبر.

بردوا سريبروماب ممكن يأخدة كبار السن، عشان يعالج اعراض الشيخوخة زي ضعف الذاكرة وقلة التركيز والانتباة.

دكاترة العيون، ممكن يكتبوا للعيان سريبروماب مع ادوية اخرى، عشان يزودا الدم اللة واصل للعين، ممكن بعد العمليات، او لو في مشكلة ممكن تتحل بزيادة وصول الدم إلى العينين.

الناس اللى في البرد والشتا، إيدها أو رجلها بتزرق، وما بتقدرش تحركها، بردوا سريبروماب هيساعدهم في المشكلة دي، وهيزود الدم اللى بيوصل للاطراف، والمشكلة هتتحل.

بص، من الأخر، أى مشكلة هتتحل او هتتحسن لو الدم اللى بيوصل للعضو زاد (اليدين او القدمين أو المخ أو العينين او الأذنين)، ممكن سريبروماب يفيد فيها.

جرعة سريبروماب حبة مرتين في اليوم، ومدة الاستعمال ممكن تختلف من حالة للتانية، لكن ممكن تتطول عادي بدون مشاكل لحد 6 شهور ورا بعض عادي.

اللى عايزك تفضل فاكرة عن سريبروماب، إنك لازم تشرب مية كتير طول ما انت بتتعالج ببرشام سريبروماب، لان البرشام دة لو ما شربتش مية كتير ممكن يعمل لك حصوات.

بردوا خد برشامة سريبروماب وسط الاكل (مش قبل ولا بعد الاكل)، وده هيقلل من مشاكل البرشام على المعدة

سريبروماب ممكن يعمل وجع بسيط في البطن، واسهال، وتحس أنك عايز تستفرغ... كل دة عادي، وهيختفي أو يقل مع الوقت.

مقالات مرجعية ذات صلة

• براكسيلان يحسن استخدام الأكسجين في الدم.
• Praxilene 200 mg, Film-Coated Tablet .

نشرات أدوية مشابهة

• نشرة حبوب براكسيلان.
• نشرة كبسولات سيريبروماب.