مصر- مشروع تجميع وتصنيع مشتقات البلازما
تجميع وتصنيع مشتقات البلازما، هو مشروع مشترك بين جهاز مشروعات الخدمات الوطني المصري، وشركة إسمها جريفولز الأسبانية. الشركة إسمها شركة جريفولز إيجيبت، ورئيس مجلس الإدارة لشركة جريفولز إيجيب هو اللواء طبيب مجدى امين.
بيعمل آية بقى المشروع دة؟
بيعمل مراكز للتبرع بالبلازما (الدم) في مناطق حيوية في مصر، ويعمل منتجات دوائية من مشتقات البلازما اللى اتبرع بيها الناس. و مشتقات البلازما اللى اتصنعت من الدم اللى اتبرع بية الناس، بتفيد فئات معينة من المرضى بامراض نادرة مثل امراض المناعة وامراض النزيف الوراثية وغيرها.
طيب أنا هاستفيد آية لو اتبرعت؟
عشان تتبرع بالدم (او بمعنى ادق بالبلازما) لازم تكون صحتك كويسة، وخالى من الامراض اللى ممكن تمنع تبرعك. وعشان كدة بيتعمل لك فحص شامل قبل كل مرة تبرع، ودة هو الشىء الوحيد اللى هتستفيدة فعلًا من التبرع بالدم (البلازما) وهو إنك تتطمن على صحتك.
طيب فين اماكن مراكز التبرع بالبلازما؟
بص يا سيدي ، انت تزور الرابط دة، وهو رابط شركة جريفولز ايجيب، وتشوف اماكن التبرع الموجودة في المحافظة بتاعتك. الخط الساخن: ١٥٤٤٢
هو آية البلازما دي؟
عارف لتر الدم ، نصة تقريبًا بلازما والنص التاني خلايا دم ومكونات اخرى. هما بقى في مراكز التبرع الخاصة بالشركة هيقوموا بفصل البلازما الموجودة في الدم اللى حضرتك هتتبرع بية، وهيقوموا بعدها بعمل مشتقات دوائية من البلازما دي.
طيب هى الأدوية دي اللى بتتعمل من البلازما اللى انا اتبرعت بيها ، بتتصرف مجانًا للمحتاجين لها؟
بصراحة ما اعرفش ، لاني حاولت أعرف من الانترنت ما لقيتش معلومة بالخصوص دة، بس ممكن حضرتك تسأل الدكاترة او اموظفين اللى في مركز التبرع عن النقطة دي.
بس بالعقل كدة، بما أنها شركة، فأكيد الشركة عايزة على الاقل تجيب مصاريفها (مش هاقول تكسب)، فلازم يكون في مقابل مادي حتى لو بسيط للمنتجات دي.
طيب يعني أتبرع ولا ما اتبرعش؟
يا عم براحتك. من ضمن الشروط أنك بس تكون متطوع (يعني ما فيش إجبار)، وعمرك اكبر من 18 سنة واقل من 60 سنة، ووزنك مش اقل من 50 كيلو وصحتك بشكل عام كويسة .
على فكرة هما مش بيأخدوا دم، هما بس بيأخدوا بلازما ، وبيرجوا باقي مكونات الدم، بص في مركز التبرع الدكاترة هيفهموك.
موضوعات ذات صلة
هدفنا هو تزويدك بالمعلومات الأكثر صلة والأكثر حداثة، ومع ذلك، نظرًا لأن المعلومات يُمكن أن تتغير مع مرور الوقت، فلا يمكننا ضمان أن تتضمن مقالات مدونة فارماسيا جميع المعلومات التي يجب أن تعرفها، كما أن بعض المعلومات قد تكون قديمة وغير محدثة، وعليك دائمًا التأكد من صحة المعلومات من مصادر أخرى. حقوق النشر: (جميع الحقوق محفوظة © فارماسيا) - تواصل معنا عبر نموذج التواصل. التحديث و الإضافة والتعديل: إذا كنت تعرف أي معلومات، تحديثات، إضافات أو تعديلات يمكن إضافتها إلى صفحات فارماسيا، فبرجاء التواصل معنا عبر نموذج التواصل أو عبر الواتسآب.
الإنتقال السريع: يمكنك الإنتقال المباشر إلى صفحة تحتوي على قائمة أسماء شركات الأدوية والمستلزمات الطبية ومستحضرات التجميل المصرية. من خلال هذة الصفحة من الرابط هنا، يُمكنك الإنتقال إلى بيانات كل شركة بالنقر على إسم الشركة. كما يُمكنك الإنتقال إلى تصنيف شركات الادوية والمستلزمات الطبية ومستحضرات التجميل في منطقة الشرق الأوسط وشمال إفريقيا من الرابط هنا.
تعليقات
إرسال تعليق